Siti “tërmet 7-ballë” ndaj Leipzigut, Erling Haland barazon rekordin e Leo Mesit në Champions

Mbrëmë u luajtën dy ndeshje të kthimit çerekfinale të Ligës së Kampioneve, ku pati emocione dhe rivalitet, por edhe surpriza të bukura. Kështu, Mançester Siti priti mbrëmë Leipzigun. Në duelin e parë midis tyre që u luajt në Gjermani, skuadrat kishin barazuar 1-1. Ky rezultat e kishte lënë të hapur mundësinë e kualifikimit për të dy rivalët. Por Siti i trajnerit Pep Guardiola nuk i la mbrëmë asgjë rastësisë. Erling Haland u tregua gjigant në fushë që në startin e ndeshjes. Talenti norvegjez shënoi dy gola të rrufeshëm brenda dy minutash. Fillimisht në minutën e 22-të me penallti, duke goditur saktë nga pika e bardhë e 11-metërshit. Kurse në minutën e 24- shënoi golin e dytë pas asistimit të Kevin de Bryjnit. Por shkëlqimi i Haland nuk do të mbyllej në atë moment. Në fundin e pjesës së parë norvegjezi shënon edhe golin e tretë personal e të tretin për skuadrën, pas një pasigurie në mbrojtjen gjermane dhe ku ai mori epërsinë e pozicionimit në gjuajtje. Pjesa e parë mbyllet kështu 3-0, një rezultat që “hipotekoi” kualifikimin e Sitit për në çerekfinale. Në pjesën e dytë Siti e nisi aty ku e la, me gola dhe spektakël. Gundogan shënoi golin e katërt për “Qytetarët” në minutën e 49-të pas asistit të Grilish. Haland do të rikthehej në skenë në minutën e 54-t, ku shfrytëzoi pasimin e Akanjit. Tre minuta më pas, në të 57’, Haland shënon golin e gjashtë për Sitin, e të pestin personal. Në këtë mënyrë, Haland barazoi rekordin e Lionel Mesit që kishte shënuar 5 gola në mars të vitit 2012 me Barcelonën në duelin kundër Bajer Leverkusenit, fituar 7-1 nga katalanasit, pas fazës së grupeve. Në grupe 5 gola kishte shënuar Luiz Adriano në duelin Bate Borisov-Shakhtar 0-7 në sezonin 2014-2015. Golin e 7-të për Sitin e shënoi De Bryjn në minutën e 92-të. Sa i takon ndeshjes Porto-Inter, ajo ishte më e paparashikueshme, pasi të dyja skuadrat qëndrojnë në këtë moment pak a shumë në një nivel. Ndeshjen e parë të luajtur në Itali e kishte fituar Interi 1-0, por mbrëmë portugezët ishin dukshëm superiorë në fushë sidomos sa i takon kontrollit të topit dhe dominimit në mesfushë. Porto pati shumë aksione sulmuese në 45-minutëshin e parë, por mbrojtja e Interit ishte shumë e fortë dhe efikase, duke ia dalë të mbajë portën e vet të paprekur. Për pasojë pjesa e parë e takimit u mbyll në barazim 0-0. Në pjesën e dytë Interi vijoi të luajë me të njëjtën skemë taktike, duke u përpjekur të mbyllë në ekstrem hapësirat e të menaxhojë fitoren nga ndeshja e parë. Volumi i lojës dyfish nga portugezët nuk u konkretizua në rezultat për Porton, ndaj Interi mendoi vetëm për kualifikimin e aspak për bukurinë e lojës. U mbyll barazim 0-0 dhe me fitoren nga dueli i parë shkojnë në çerekfinale italianët.