Integrimi europian i Serbisë, ambasadori amerikan: Më shumë SHBA nuk do të thotë më pak BE

Ambasadori amerikan në Beograd, Christopher Hill ka deklaruar se SHBA dëshiron një marrëdhënie më të mirë dhe më të thellë me Serbinë. Deklaratën, Hill e dha ditën e djeshme, teksa mbajti fjalën e tij në një akvititet të organizuar nga Dhoma e Tregtisë në Serbi. “Unë besoj se Serbia tani po merr vendime të mira dhe po shkon në drejtimin e duhur. Sigurisht që do të ketë ende vështirësi, por SHBA e sheh Serbinë si një partner të mirë me të cilin mund të punojë dhe me të cilin do të jetë më afër në të ardhmen”, theksoi ai. Sipas Hill, nuk është sekret që SHBA e mbështet Serbinë në rrugën e saj drejt anëtarësimit të plotë në Bashkimin Evropian. "Ne jemi dy vende të ndara nga një oqean i madh, por ne nuk jemi të ndarë nga BE, sepse një pjesë thelbësore e rolit të Amerikës këtu është të mbështesë Serbinë në përpjekjen e saj për t'u bashkuar me BE," tha diplomati amerikan. Ai tha se “më shumë Amerikë nuk do të thotë domosdoshmërisht më pak Bashkimi Evropian, por më shumë nga të dyja". Hill vlerësoi se ka çështje që duhet të zgjidhen, dhe përmendi një numër të madh kapitujsh dhe grupimesh, por theksoi se SHBA-ja dëshiron ta ndihmojë Serbinë që ta kalojë atë proces dhe të bëhet një anëtare e plotë e BE-së. "Shpresoj që njerëzit ta kuptojnë këtë koncept thelbësor që Serbia duhet të ndryshojë drejtimin e saj, t'i afrohet plotësisht Perëndimit", tha ai dhe shtoi se Serbia i përket BE-së. Hill shtoi se do të donte që Serbia t'i bashkohej, por jo me të gjitha problemet e saj. Ai theksoi se Serbia duhet të fokusohet në zgjidhjen e problemeve rajonale dhe disa nga mekanizmat janë Procesi i Berlinit dhe Ballkani i Hapur. Ai tha edhe se populli ka kaluar nëpër sisteme të ndryshme, dhe se kjo mund të ketë rraskapitur shumë serbë.