Salloni Ndërkombëtar i Librit çelet në Torino, Shqipëria pjesëmarrëse mes 44 shtetesh

Salloni Ndërkombëtar i Librit u çel në Torino. Këtë vit Shqipëria është vend mik i sallonit në Torino mes 44 shtetesh dhe 200 profesionistëve të enteve botuese. Në ceremoninë e hapjes së sallonit, ishin të pranishëm presidenti i senatit italian Ignazio La Russa, ministri italian i kulturës Gennaro Sanguliano, presidenti i rajonit të Piemontes, Alberto Cirio, dhe kryetari i bashkisë së Torinos, Stefano Lo Rosso. Nga pala shqiptare e pranishme ishte ministrja e kulturës Elva Margariti, si dhe përfaqësues të shtëpive  botuese shqiptare, ndër të cilët edhe Qendra e Studimeve dhe Publikimeve (QSPA), përfaqësuar nga drejtorja ekzekutive Diana Kastrati dhe studiuesja Silvana Nini. “Në ceremoninë e hapjes është pritur në mënyrë të ngrohtë e duartrokitje të zgjatura drejtori editorial i Sallonit Ndërkombëtar të Librit në Torino, Nicola Lagioia që bëri të mundur realizimin e këtij aktiviteti si një prej panaireve më të rëndësishme në botë”, thuhet nga QSPA. Ndërsa Qendra Kombëtare Librit dhe Leximit shprehet gjithashtu se një lexim në gjuhën e imazhit e veprës “Kronikë në gur”, të shkrimtarit tonë Ismail Kadare, pavijoni shqiptar ka tërhequr vëmendjen e mijëra lexuesve. Në sallën "Albania" në Torino do të ketë rreth 40 aktivitete. Do të ketë prezantime e tryeza me emrat më në zë të letrave shqipe si Lea Ypi, Ornela Vorpsi, Bashkim Shehu,  Ardian Ndreca, Fatos Kongoli, Ylljet Aliçka, etj. Për vendin tonë, një sallon i konceptuar si një vepër, që i fton vizitorët të hyjnë në të dhe të zbulojnë Shqipëri në letrare, e cila gjithë herët ka ofruar një letërsi europiane, me stacionet e veta të ndalimit dhe pengesa, por me një orientim të qartë perëndimor, që vjen që në kohërat e Buzukut e Bogdanit, te autorët e Rilindjes Kombëtare, ata të shek. XX e deri në brezat më të rinj të shkrimtarëve. Ky sallon në Torino do të jetë i hapur për 5 ditë radhazi, prej datës 18 deri më 22 maj, me një agjendë të ngjeshur dhe të larmishme aktivitetesh.