Ministria e Kulturës, aplikimi për projektet e 2022 deri më 17 janar

Ministria e Kulturës hapi thirrjen për projekte kulturore për vitin 2022 më 15 dhjetor të vitit që lamë pas. Sipas MK, kjo thirrje ka afat deri më 17 janar të këtij viti dhe më datë 31 janar do të bëhet shpallja e fituesve. Ministrja Elva Margariti në një status të saj shprehej një ditë më parë se përmes thirrjes së hapur për projekte që lidhen me trashëgiminë, artin e teknologjinë, mbështesim skenën e pavarur artistike e të rinjtë e talentuar. Në thirrjen e publikuar për projektet, ministria shprehet se pandemia Covid -19 tregoi se qasja e publikut me institucionet kulturore, trashëgiminë, monumentet, muzetë, galeritë, parqet arkeologjike apo evenimentet mund të realizohet edhe virtualisht, edhe përmes arritjeve teknologjike. Ministria e Kulturës shprehet se është angazhuar në krijimin e një klime të shëndoshë për nxitjen dhe mbarëvajtjen e aktiviteteve kulturore, promovimin e vlerave të trashëgimisë sonë materiale dhe jomateriale, me qëllim mbajtjen gjallë të komunikimit me publikun. “Programi i Ministrisë së Kulturës për Artin dhe Trashëgiminë 2022 do të sigurojë mbështetje konkrete për industritë krijuese në vend, duke cekur të gjithë sektorët kulturorë, duke synuar forcimin e kapaciteteve të artistëve dhe operatorëve kulturorë, përmirësimin e cilësisë artistike, promovimin e prodhimeve të tyre dhe lehtësimin e qasjes së tyre në mekanizmat inovativë të financimit. Kjo thirrje synon mbështetjen e projekteve që zhvillohen ekskluzivisht ose kryesisht në Shqipëri”, thuhet nga ministria. Projekt-propozimet e paraqitura duhet të realizohen brenda vitit buxhetor, që do të thotë se aktivitetet e propozuara duhet të zhvillohen brenda periudhës 10 shkurt - 5 dhjetor 2022. Çdo njoftim do të bëhet përmes faqes zyrtare të Ministrisë së Kulturës www.kultura.gov.al.