Drama “Gadjo” bashkëprodhim i Teatrit Eksperimental dhe qendrës “Multimedia” në teatrin “Oda”

Drama “Gadjo” u shfaq premierë muajin e kaluar në skenën e Teatrit Kombëtar Eksperimental “Kujtim Spahivogli”, por do të jetë për dy net në skenën e teatrit “Oda” në Kosovë. Shkruar nga Jeton Neziraj vepra vjen në skenë me regji nga Blerta Neziraj. Në role janë Edona Reshitaj, Juli Emiri, Verona Koxha, Rafael Hoxhaj, Blend Sadiku. “Gadjo” (dramë) është bashkëprodhim i Teatrit Kombëtar Eksperimental “Kujtim Spahivogli” dhe qendrës “Multimedia” Prishtinë dhe do të shfaqet në teatrin “Oda” në datat 23 dhe 24 maj. Drama “Gadjo” (një term që romët e përdorin për jo-romët) synon të nxisë debat mbi racizmin dhe ekstremizmin e dhunshëm te të rinjtë në Kosovë e në Shqipëri, por po ashtu synon të hulumtojë dhe analizojë këtë shekull të mosdijes dhe intolerancës që nxitet e promovohet nga mediat e papërgjegjshme, në një mjedis ku tregu medial është kaotik dhe i pakontrolluar dhe ku nevoja për "klikime" është shndërruar në qëllim sipëror. ““Gadjo” nxit dhe konfronton shoqërinë shqiptare mbi romët, mitet mbi ta dhe pozitën e tyre në shoqëritë tona, ku racizmi, përbuzja janë të ngulitura thellë në vetëdijen tonë. “Gadjo” është një dramë për krejt këta të rinj e të reja, që me kurajo e vendosmëri po e përqafojnë këtë shekull të dhunës e mosdurimit, për të cilin kemi kontribuar të gjithë ne, por më së shumti, mediat dhe shkollat tona.  Demonët e dhunës janë ringjallur dhe po kalërojnë shesheve të qytetet tona...”, thuhet rreth veprës në faqen e qendrës “Multimedia”, Prishtinë. Kompozitor Jindrich Cizek, kostumograf  Blagoj Micevski, koncepti vizual dhe skena Mentor Berisha, realizimi i skenografisë Beqo Nanaj. Teatri i pavarur “Oda” është themeluar në fund të vitit 2002 në Prishtinë.  Dramaturgu nga Kosova Jeton Neziraj ka shkruajtur pjesë të ndryshme teatrale, të cilat janë vënë në skena të vendeve të ndryshme në Europë, por edhe në SHBA. Shkrimet dhe dramaturgjia e tij është përkthyer në më shumë se 10 gjuhë.