Franca në kaos, reforma e pensioneve nxjerr qytetarët në rrugë, Macron rrezikon mocionin e mosbesimit

Franca është në prag të një kolapsi demokratik për shkak të propozimit jopopullor të presidentit Emmanuel Macron për reformën e pensioneve. Protestat janë përshkallëzuar dramatikisht në vend, duke u shndërruar në të dhunshme. Mbi 300 persona janë arrestuar në të gjithë Francën, ndërsa qeveria e Emmanuel Macron përballet me shumë reagime për zbatimin e reformave të pensioneve që do të bëjnë që mosha e pensionit të rritet me dy vite. Mes thirrjeve të "dorëheqjes" nga opozita, kryeministrja franceze Elisabeth Borne njoftoi se qeveria e saj e pakicës do të përdorë nenin 49.3 të kushtetutës franceze, sipas të cilit ata mund të anashkalojnë votimin. Plani i Macron u miratua pas dy muajsh grevash mbarëkombëtare dhe disa nga protestat më të mëdha në dekada.Miliona njerëz kanë shprehur kundërshtimin e tyre ndaj planit të qeverisë. Dy nga sektorët që janë prekur nga këto protesta të dhunshme janë arsimi dhe transporti. Qeveria e mori vendimin pasi kishte frikë se nuk do të siguronte vota nga shumica e deputetëve. Tani partitë opozitare do të thërrasin një votë mosbesimi ndaj qeverisë, që pritet të mbahet të hënën. Nëse kjo ndodh, kryeministri me siguri do të japë dorëheqjen dhe Macron mund të shpërndajë parlamentin. Nëse dështon, grupet opozitare kanë premtuar të përmbysin reformën duke paraqitur një apel në Këshillin Kushtetues ose duke kërkuar një referendum popullor. Që Macron të rrëzohej nga mocioni i mosbesimit, do të kërkonte një numër të madh deputetësh nga partia e djathtë Les Républicains. Por ata kanë bërë me dije se nuk do ta bëjnë diçka të tillë.