“Udhëtime jashtë vendit me personazhe të krimit”, dalin emrat me kë drekoi Arjan Ndoja pak para se t’i bëhej atentati

Komisioni i Pavarur i Kualifikimit ka bërë publik raportin mbi prokurorin e Durrësit Arjan Ndoja, të cilit iu bë atentat në Shkozet, ku mbeti i vrarë shoferi i tij.

Në raportin e KPK janë zbardhur të gjitha lidhjet e tij, duke nisur nga miqësitë me politikanë dhe zyrtarë të sistemit të drejtësisë, tek personazhet e botës së krimit, siç është ajo me Aleksandër Lahon i njohur ndryshe si “Rrumi i Shijakut”.

Në raport theksohet se ditën që i është bërë atentati, Prokurori Ndoja ka qenë duke drekuar në një restorant në Durrës me Enver Shabën dhe disa persona të tjerë, të cilët sipas sistemit “TIMS” rezulton se ka udhëtuar edhe jashtë vendit.

Gjithashtu në raportin e KPK duke u referuar të dhënave të marra nga sistmei “TIMS”, thuhet se   prokurori Ndoja ka udhëtuar disa herë jashtë kufijve të Shqipërisë me persona me precedentë kriminalë.

– Nga aktet procedurale të administruara nga ana e SPAK, subjekti Arian Ndoja dhe persona të tjerë kanë qenë duke drekuar para sulmit me z. E. Sh.

– I pyetur gjatë procesit të rivlerësimit, subjekti ka deklaruar se automjeti me targa **** është në pronësi të shtetasit B. K., duke deklaruar se është njohje e tij që në vitin 2005, me të cilin ka lidhje dhe shoqëri familjare.

– I pyetur gjatë procesit të rivlerësimit për marrëdhënien me këtë shtetas subjekti ka deklaruar se ka njohje për shkak të shërbimeve që ofron në servisin e makinave “***”, ndodhur në autostradën Durrës-Tiranë. Më tej, ka deklaruar se dy automjetet e mësipërme kanë qenë në pronësi të shtetasit D. B. P. dhe bëhet fjalë për të njëjtin mjet.

– Në lidhje me shtetasin E. V. rezulton materiali procedural nr. ***, datë 7.4.2014, për veprën penale “pushtim i tokës”, për të cilin me vendimin e datës 2.6.2014, prokurorja P. P. ka vendosur mosfillimin e procedimit penal, si dhe procedimi penal nr. ***, datë 3.6.2019, dërguar gjykatës me kërkesë për pushim për veprën penale “shpërdorim i detyrës”, parashikuar nga neni 248 i Kodit Penal dhe dërgim në gjyq për veprën penale “ndotje e ajrit”, parashikuar nga neni 201 i Kodit Penal.